ДОНОРЫН ТУХАЙ

Кадавр донороос элэг, бөөр, шөрмөсийг шилжүүлэн суулгаж, 8-10 хүний амьдралын чанарыг сайжруулдаг. Монголд элэг, бөөр,шөрмөс  шилжүүлэн суулгах 16 баг ажиллаж байна. Дээрхи багууд УНТЭ, ХСҮТ, ГССҮТ-ийн дэргэд ажилладаг. Ганцхан жишээ дурьдахад  шөрмөс шилжүүлэн суулгаснаар шөрмөс нь  тасарснаас үүдэн суумгай байсан хүмүүс алхдаг болох гэх мэтээр амьдралын чанар нь дээшилдэг.

Донорын тухай хуульд заасны дагуу кадавр донорын ар гэрт хөдөлмөрийн хөлсний доод хэмжээг 10 дахин нэмэгдүүлсэнтэй тэнцэх хэмжээний тэтгэмж олгодог юм. Урьд нь кадаврын донор болсон иргэн нийгмийн даатгалын шимтгэл 3 жил төлсөн тохиолдолд 3,5 сая төгрөг олгодог байсан. Энэ нь нийгэм эдийн засагтай харьцуулахад харьцангуй бага байсан тул Донорын тухай хуулийн шинэчилсэн найруулгад тэтгэмжийг 2 дахин нэмж чадсан юм.

Бурханы шашинд өөд болооч нь эд эрхтэнээ хандивлах нь асар их буян гэж үздэг. Үүнээс үүдэн өөд болоочийн хойтын буянд тооцогддог. Учир нь хүнд амьдрал бэлэглэнэ гэдэг буяны дээд буян юм. Хүн энэ хорвоод хоосон ирээд хоосон буцдаг гэдэг гэхдээ өөрийн эд, эс, эрхтэнээ бусдад өгч амьдрал бэлэглэнэ гэдэг хүний хийж чадах дээд үйл. Энэ нь хойд нас хийгээд сайн төрлийг олоход саад болдоггүй гэдгийг бурханы шашны төлөөлөгчид үздэг.